ti no me veddi, ma te son vixin - buone riscritture di buone vecchie storie









E finïo tutto, e andæti via i parenti,
e in ta memöia o fünerale scüo
in sce l’arco do ponte e a campann-a
grâve ca dâva l’ürtimo salüo,
ti ti è comme addesciâ drento a cuxinn-a
co-o poæ grixo, serrò drento a-a sô penn-a
e sêu e fræ piccin chi te ammiâvan:
tûtti quei euggi sciûti i domandavân
-e öua…?- e alloa, sensa pensà
Ti è fæto in gesto, ti ti-è infiâ o scösà
ti ti –è ammià in po’ in gïo, ti è drissò a schenn-a,
in to muccio ti è accomodò i cavelli,
ti è sciûgò naso e bocca a-a ciù piccinn-a,
ti è misso na pignatta in sce ‘i fornelli,
scondendo e lagrime t’è fæto senn-a:
xûäva a-o nïo na nêuva rondaninn-a
pe diventà coscì, voeî o no voeî
a moæ de tutti, de diritto e de doveí.
E o tempo a l’ha comensò a stissà
Gussa a gussa, giorno doppo giorno,
in ta casa gh’èa tutto da pensà,
da-a mattin presto ti te dâvi attorno
ma-a domenega che tûtti i l’èan a-a messa
ti zûgavi co-a bamboccia de pessa.
I fræ pe-e Meriche a sercâ fortùnn-a:
lettere pinn-e de malinconia
sempre ciù rêe e donde, man aman,
da sto posto distante comme a lûnn-a,
se mesccïâvan parolle in castiggian;
ogni sêu a l’è anæta pe a sò via,
pe conto sò a s’è fæta na famiggia,
nïsciün o s’è accorto o-o ghe pensâva:
ti t’èi a primma e ti restavi figgia;
ma o mondo de ‘na votta e l’èa ancon lì
proprio pe questo, proprio grassie a tì
che ti tegnïvi giardin, stansie, cuxinn-a
comme na sposa, anche se t’èi fantinn-a.
E vegniva l’estæ ! Riveddo a scena,
tûtti assettè a-o fresco in ta veranda,
pan de granon da-o forno pe-a merenda,
o sciroppo de rêuza, l’amarena,
profûmmo de lillà da-o giardinetto
e, contro a-a cinta, e rêuze a massetto.
E sûtta se sentiva scûre a Scrèia
e o baccaià de donne chi lavavan
allegre, in zenoggio in ta banchetta
E quande vegnïva adaxo a seia
e da –i orti e da-a stradda se levavan
voxi tranquille, o sbatte de segge,
o drin drin de na bicicletta,
in to ronfò ti aççendêivi quattro satecchi
pe fâne na frîtâ de barbabecchi.
E, da zoënotto, çerti mæ ritorni
pe tanto tempo godûi, immaginè:
e nissêue da-a cinta do giardin,
a facciata co-o verde de gioxie,
a porta vernixà de celestin
da cuxinn-a, e tò brasse spalanchè,
e mi che te parlâvo di mæ giorni
feliçi, te contâvo da mæ vitta
speranse, dexideri, fantasie
e ti, che a vitta ti a saveìvi tutta,
ti me stavi a sentì co-o tò sorriso
pin de pasiensa e intanto con e dîe
ti comodâvi na torta de riso.
Da tanto tempo i l’han taggiò e nissêue
In to giardin coverto dall’erbassa,
in ta veranda, in te stansie vöe
o tempo inutilmente lento o passa
e ricordi e lagrime o cancella,
e voxe chi l’impivan tûtta a cà
ûnn-a a votta adaxo i l’han taxüo,
anche pe tì, ûrtima sentinella,
o tempo do gran viaggio o l’è vegnûo:
ancon ‘na votta ti è passà de là
do ponte e o funeräle scûo
e a campann-a ca dâva l’ûrtimo salûo,
a vitta e a morte sempre i se ripëtan,
porte e barcoin i son serè in ta cà,
là in fondo gh’è i tò vëgi chi te aspëtan,
Voriëva fa pe mi, lalla fantinn-a,
in zêugo co-a memoïa e con o chêu:
poèi ritornà pe n’attimo figgêu
in tò regno, quella gran cuxinn-a
co-o pavimento de moin sempre lûstré
e attacco a-e müage rammi e cassaolin,
ma no ti gh’è, te treuvo in to giardin,
con a gèa, e aiuole ben cûré
con tûtto in gïo i moin a cartabon
-gh’èa na sciôa differente a ogni staggion –
Ti cûxi, assettâ in sciä vëgia banca
a-o fresco sotto a-e ramme de nissêue
-no t’ho mai vista co-e man ferme, vêue,
no t’ho mai sentîo dî: me sento stanca –
ti no me veddi, ma te son vixin:
me chinn-o in sciä tò testa adaxo, adaxo
i sceï cavelli grixi pöso in baxo
e in scöso na sciôa de settembrinn-a
arrobà da-o tò giardin, lalla fantinn-a.




*

Nessun commento:

Posta un commento

here we are