Fiorenzo Toso da ponente, per mare

Lascia ch’o segge o vento ch’o te çerne

a megio rotta,

e ti vannighe apreuvo.

Partî o no conta, no se sa l’arrivo,
o viægio solo o te mantegne vivo.

A-a neutte ti confii quello chi resta
da tò voentæ,
ch’a l’é de stâ sospeiso

sensa regordi
sensa dexii

co-o còrpo ch’o se smaina
e l’anima into veuo.

Lascia che sia il vento a scegliere per te / la rotta migliore, / e assecondalo. // Partire non conta, non si conosce la destinazione, / soltanto il viaggio ti mantiene vivo. // Alla notte affidi ciò che rimane / della tua volontà, / che è di rimanere sospeso // senza ricordi / senza desideri // col corpo che si consuma / e l’anima nel vuoto.


*

In fondo a-o barco se ghe sta à redòsso
e tanto basta.
Che destin ghe segge
a-a fin da rotta,
no ghe raxoño inte sti tempi longhi
e desaugiaddi, pægi à ’n rosäio
sensa intension.

Un o s’accoega, e a tuga o te l’ingheugge
comme a camixa in pansa a-a moæ.

Ninte de coæ
ninte speanse, e o lento
scuggiâ de l’ægua
sott’a-o bastimento.

In fondo alla nave si sta al riparo, / ed è sufficiente. / Di quale destinazione ci sia / alla fine della rotta, / non discuto in questi tempi lunghi / e indolenti, simili a un rosario / recitato senza intenzione. // Ci si corica, e la tuga ti avvolge / come la placenta nel ventre della madre. // Nessun desiderio / nessuna speranza, e il lento / scivolare dell’acqua / sotto il bastimento.