dei libri preferiti, uno - con traduzione dall'it.

N.d.t. :

o mæximo italian do Remigio Zena o l’è basou in sciâ scintasci zeneise: no gh’è squæxi de passou remöto, a construçion da frase a l’è ciù zeneise che italiaña. Mi, int’un çerto senso, ò solo riportou o romanzo inta lengua inta quæ o l’ea stæto pensou.

*

No staggo chì à parlâ de l’importansa d’ "A bocca do lô", "La bocca del lupo", 1892 do Remigio Zena (Gaspare Invrea, 1850-1917) e ni da figua do sò autô, ch’a l’é ben conosciua tra quelli chi se òccupa de lettiatua italiaña, mascime scrita in Liguria. Sto romanso, stæto visto tante vòtte comme un fruto da verscion zeneise do verismo, o va a-o de là de l’imitaçion de forme cae à di scrïtoî comme Giovanni Verga e Luigi Capuana, e o propoñe unna lettua da realtæ zeneise da segonda meitæ de l’Euttoçento, inta quæ un o sente ascì (e ancon de ciù) a leçion di meistri do naturalismo franseise.

A gh’è ascì, into romanso, unna ciæa attençion a-a narrativa in zeneise che inte quelli anni a sciortiva à pontæ in scî periòdichi comme «O Balilla» e «O Stafî», e no l’é un caxo che o Zena o minsuñe ciù d’unna vòtta un de quelli giornali, «O Castigamatti»: l’é ben ciæo che l’autô (do quæ se conosce ascì de poexie in zeneise) o tegniva d’euggio quelle forme de lettiatua popolare, che pe l’ambientaçion e pe-i temi reciamman mai tanto l’argomento d’ "A bocca do lô".

Pe sta raxon ascì, fòscia, a scrïtua do Zena, ch’a repiggia tanti aspeti da scintasci do zeneise into sò italian, a vëgne à taggio pe unna verscion in zeneise, comme se o romanso o fïse stæto (cösa che de seguo a no l’é) «pensou» pròpio in zeneise e «traduto» int’unna lengua che, à tutte e mainee, a se peu ancon oua gödî ciù che quella de atri scrïtoî italien da mæxima epoca. Mette in zeneise "La bocca del lupo" o riesce ben, coscì, no solo pe quello che into testo o reciamma a lengua inta quæ l’emmo portou, ma ascì pe-a modernitæ de l’insemme, pe-a vocaçion do Zena à scrive, inte sto caxo, int’un italian «parlou».

Ò çercou pe quello che poeiva de rende con un zeneise sccetto a stöia da Bricicca e de seu figgeue, con reciammâme à quello di scriti di anni inti quæ o Zena o â componeiva. Sensa ëse zeneise de l’Euttoçento, quello che propoño chì o no l’é manco o fruto de l’italianizaçion di urtimi anni, e o peu presentâse (coscì speo) comme un exempio de scrïtua da giornâ d’ancheu, attenta a-a qualitæ do lescico e da scintasci do zeneise parlou. Quarche savô de rivea, chì e là, l’ò misso con intençion, into tegnî conto che unna parte do romanso a l’à pe tiatro un paise do Ponente, «Manasseua», che pe ciù d’un indiçio o vëgne à combaxâ, ammiæ un pittin, co-a mæ Arensen; e che riveasche son a Bricicca e e seu figgeue.

Do resto, comm’o diva za o Gazzo do 1909, into presentâ a sò traduçion d’ "A diviña comedia", un travaggio pægio o no se fa de seguo pe façilitâ a comprenscion do testo a-i lettoî zeneixi da giornâ d’ancheu, quante pe mette a-a preuva e poscibilitæ da lengua e pe çercâ de dâ, se no un modello, a-o manco unna indicaçion in sce comme scrive in zeneise segondo un çerto gusto e unna çerta propietæ. Pe chi agge de difficortæ in sce quarche passo, se capisce, o testo originäio italian o saià d’aggiutto, ma me sentieiva de dî che pe unna persoña ch’a conosce a lengua, ò ch’a ghe l’agge a-o manco inte oege, sta verscion a segge de bon leze, e ch’a pòsse dâ unna man à affamiggiâse co-o zeneise scrito. 

A l’é sta chì, ciù che tutto, a raxon pe-a quæ m’ò piggiou a breiga de tradue un di libbri che ò delongo tegnuo tra i ciù rappresentativi da coltua zeneise, comme pittua de ambienti, de scituaçioin e de mentalitæ che ascì quande peuan pai lonten da-a nòstra realtæ e da-a nòstra senscibilitæ a-a giornâ d’ancheu, ne forman a-o conträio, in boña mesua, o retrotæra: à partî fiña da-a «grammiçia» cinica do Zena inti confronti di seu protagonisti, pe no dî ninte de tanti aspeti che lascian straluxî di comportamenti collettivi e de mainee de propoñise, inti quæ tanti de niatri se peuan reconosce: baste solo dâ a mente a-o fæto che i protagonisti grammi do romanso en tutti foestê, ò che l’autô o se mostra mäfiaddo inti confronti do stato e de sò instituçioin, no meno di sò personaggi, segondo unna mentalitæ co-a quæ n’é tanto cao rappresentâne.

Mi m’appenso coscì, che leze in zeneise "A bocca do lô" a segge unna boña öcaxon pe conosce sto libbro, se capisce, ma ascì pe conoscine à niatri, into ben e into mâ. E che de seguo l’exerçiçio fæto in sciâ lengua o l’agge unna sò raxon d’ëse ascì comme instrumento de lettua do testo, ch’o vëgne misso in neuva luxe coscì comme, a-o prinçipio di anni Ötanta de l’atro secolo, a reduçion pe-o tiatro stæta fæta da-o Arnaldo Bagnasco, con l’interpretaçion da Lina Volonghi, a l’à permisso de «intrâghe drento» int’unn’atra mainea ancon.

Me fasso fòrte de l’idea che un ch’o l’arrive à leze sta verscion zeneise o l’avià meuiou unna comprenscion ciæa de quello che l’autô o ne voeiva dî, segondo a raxon ch’a sta sotta à tutte e iniçiative de traduçion inte che lengua se segge; ma ch’o l’arrive ascì à unna reflescion in sciâ realtæ inta quæ vivemmo, fonçion che o libbro, segondo mi, o soffraga ben do bello. 

E in sciâ fin, che chi leze "A bocca do lô" in zeneise, o l’arrive no à «imprende» o zeneise (perché s’o â leze, a lengua o â conosce za tanto che basta), ma scì à conoscilo megio, e à fâsene unn’idea ciù ciæa de comme o pòsse ëse instrumento de comunicaçion no meno che mezo adattou à rappresentâ quello che semmo.

da Parlo ciaeo, Il Secolo XIX

*